नोआखाली माणुसकीचा अविरत लढा

Description

आधुनिक भारताच्या इतिहासात घडलेल्या भीषण दंग्यांची जेव्हा चर्चा होते तेव्हा नोआखालीचे नाव आवर्जून घेतले जाते. 16 ऑगस्ट 1946 रोजी मुस्लिम लिगने पुकारलेल्या प्रत्यक्ष कृती दिनाच्या निमित्ताने कोलकत्ता येथे भीषण सांप्रदायिक दंगे भड़कले.  त्याची धग कोलकातापासून 400 किलोमीटर दूर असलेल्या आजच्या बांग्लादेशमधील नोआखाली जिल्ह्यापर्यंत जाऊन पोहोचली.  तेव्हा नोआखालीतील अल्पसंख्य हिंदूंचे अश्रु पुसण्यासाठी, त्यांच्यात आत्मविश्वास निर्माण करण्यासाठी शहात्तर वर्षांचे वयोवृद्ध गांधीजी तेथे चार महीने जाऊन राहिले.  हां त्यांच्या आयुष्यातील सर्वात  कठीण काळ होता.  मानवाच्या इतिहासात सत आणि असत शक्तींमध्ये अखंड चाललेल्या संघर्षात चिरंतन सत मूल्यांच्या रक्षणासाठी गांधीजींचे नोआखालीत जाऊन राहणे यास फार मोठे महत्त्व आहे.  किंबहुना आज आपला समाज स्वातंत्र्योत्तर काळातील सर्वात कठीण आव्हानाला सामोरा जात असताना हे महत्त्व आणखी वाढते.  कारण सांप्रदायिकतेच्या समस्येने आज अत्यंत उग्र रूप धारण केले असून पुन्हा एकदा मानवतेच्या अस्तित्वापुढे प्रश्नचिन्ह निर्माण झाले आहे.

अशा पार्श्वभूमीवर हिमालयाएवढ्या आव्हानाचा सामना करत गांधीजींनी मानवाच्या असीम आत्मबलाचा अत्युच्च मानबिंदु नोआखालील कसा प्रस्थापित केला, याची ही कहाणी रमेश ओझा आणि श्याम पाखरे या लेखक द्वईंनी आपल्यासमोर मांडली आहे.  आजच्या अत्यंत निराशाजनक परिस्थितीत नोआखाली पर्वाचे स्मरण करून देणारी ही कादंबरी वाचकांना मानवतेच्या रक्षणासाठी नवी प्रेरणा देईल अशी आशा आहे.