आदिवासी संस्कृती, इतिहास आणि वेदना

       पुणे जिल्ह्यातील उरुळी कांचन येथील प्राथमिक शाळेत सेवक या पदावर नोकरी करत असताना आपला समाज आपले समाज बांधव यांच्या वाट्याला आलेल्या वेदना, दुःख, अंधश्रद्धा  व अज्ञान यांना वाट करून देत समाजातील प्रश्नांना वाचा फोडण्यासाठी भास्कर भोसले यांनी आपली लेखणी झिजवली. त्यातून पारधी समाजाची व्यथा मांडणारी ‘दैना’ हि कादंबरी २००३ साली आली आणि तिने एक वैचारीक खळबळ माजवली. तिला आजपर्यंत अनेक पुरस्कार मिळालेले आहेत.
पारधी व इतर जमातीची संस्कृती, इतिहास आणि वेदना त्यांनी आपल्या “आदिवासी संस्कृती, इतिहास आणि वेदना” या ऐतिहासिक ग्रंथात मांडली आहे. सामाजिक जाणीव आणि भान असलेले भास्कर भोसले हे एका दिशाहिन समाजाचे नेतृत्व करताना आपल्याला दिसतात. महाराष्ट्रातील आदिवासी समाजाच्या उन्नतीसाठी ते सतत प्रयत्नशील आहेत. तळमळीचा संशोधक, अभ्यासक आणि एक खंदा कार्यकर्ता म्हणून त्यांचे नाव घेता येईल.